ҚБМ: Шағын футбол – ұлы достық негізі

Қаражанбас мұнайшылары ұжымдық рухты нығайтып, салауатты өмір салтын сақтауға ерекше көңіл бөледі. Осы мақсатта қабат қысымын ұстау цехы жұмысшылары шағын футболдан турнир ұйымдастырып, тартысты бәсекенің мықты командасын анықтады.

Цехішілік жарыс кәсіби футболшылар ойынынан кем түспеді. Додаға операторлар, слесарьлар мен машинистер, шеберлер де мықты дайындықпен келген. Алдымен «4 бригада» және «5-7 бригада» командалары кездесіп, ерекше ойын өрнегін көрсетті. Турнир кестесіне сәйкес әр матч сайын бірлігі жарасқан бригадалардың жеңіске деген құлшынысы арта түсті. Ойыншыларға жанкүйерлер қолдауы жігер беріп, сәтті пастар жарқын голдармен жарасым тапты.

«Жұмыстан тыс уақытты тиімді өткізіп, спортпен шұғылдану арқылы әріптестер арасындағы бірлікті нығайттық. Осындай жарыстар арқасында ұжымдық қарым-қатынасымыз одан әрі дамып, беки түсетіні сөзсіз. Тек өзара емес, цехаралық, мекемеаралық додаларда топ жарып, жетістігімізді еселейік», – дейді жұмысшылар.

Қорытындыға сәйкес, «2-8 бригада» құрамасы төртінші сатыға тұрақтады. Ал «4 бригада» жігіттері үздік үштікті түйіндеді. Ерекше ойынымен көзге түскен «6 бригадаға» екінші орын бұйырды. Шашасына шаң жұқтырмаған «5-7 бригада» құрамасы жарыс жеңімпазы атанып, І орын иеленді. Жүлдегерлер мен жеңімпаздарға мақтау қағаздары, сыйлық сертификаттары табыс етілді.